ازاي اشتغل فري لانسر في مجال الترجمة ؟
أي حد بيحاول يقدم حاجه يخدم بيها الناس لازم يحدد هدفه من الحاجه دي
و احنا هدفنا من المقال دا اننا ننشر بين الناس ثقافة استخدام الانترنت كمجال للعمل
و اكتساب المهارات و الخبرات بدل ما نستخدمها في تضييع الوقت و نختصر على نفسنا سنين التوهان..
المقال دا مهم لكل مترجم لسه بيشق طريقه في مجال العمل و عاوز يشتغل فري لانسر
الأول بس عاوزين نعرف يعني ايه فري لانسر ؟
فري لانسر يعني عامل حر عمله غير مرتبط بشركة أو مؤسسة
ولكن هو عبارة عن مهمة او وظيفة بتتقدم من خلال عملاء مختلفين
من جميع أنحاء العالم بيجمعهم مواقع عالمية متخصصة لهذا الغرض بيشترك فيها القائمين بالأعمال
وأصحاب العمل مقابل نسبة تخصم من احد الطرفين
( النسبة من%10 ل %15) أو اشتراك سنوي او نصف سنوي حسب سياسة الموقع .
(على فكرة احنا كدا اختصرنا الموضوع دا بيتقال في محاضرات)
- تشترك في أكتر من موقع زي (upwork وfreelancer)
- تدرس الموقع اللي هتشترك فيه و تعرف متطلباته لأن المواقع دي مش بتختار أي حد
و فيه منها بيعمل اختبارات و interview زي upwork.
- تعمل لنفسك portfolio كويس تعبر فيه عن نفسك و عن الحاجات اللي انت اشتغلت فيها قبل كدا
- تختار العملاء بتوعك بدقة و تشوف الrate بتاعهم عشان محدش ينصب عليك.
- تخلص الشغل المطلوب منك في الوقت المحدد و ياريت قبل الوقت ان أمكن لأنك مينفعش تتاخر.
- مينفعش تقدم على شغل أنت مبتعرفش تعمله لأنك لو معملتوش صاحب الشغل هيديك تقييم سيء و سمعتك مش هتبقى كويسه.
- تحول الفلوس لأقرب بنك لبلدك.
أشهر مواقع العمل الحر ؟؟
المواقع دي مش خاصة بالترجمة دول أشهر مواقع العمل الحر اللي مش هتقدر من خلالهم تختار اللي يناسبك ما كتر الشغل اللي عليهم.
**اللي بيميز الفري لانسر عن الوظيفة حاليا انك بتقدر تشتغل في اللي انت بتحبه و شاطر فيه و بس
من غير روتين و ملل و كل يوم فيه جديد .. سواء كنت طالب أو كنتي ست بيت و حياتك الأسرية مش بتتيح لك الفرصة انك تنزلي تشتغلي
كل المطلوب منك انك تكون شخص بيعرف ينظم وقته كويس .
نيجي بقى للمواقع :-
1-UpWork
بعد دمج موقع Elance و Odesk في كيان واحد اسمه upwork أصبح أقوى موقع على مستوى العالم في مجال الفري لانس
و فيه ناس اساسا مش بتشتغل غير عليه و مش ملاحقين شغل.
2-freelancer
بدأ في 2004 و مشهور بإقبال عالي جدا.
3-Ifreelancer
و دا موقع سهل انك تعمل accountعليه و تبدأ تبحث عن شغل تعمله بسرعة.
4-fiverr
أي خدمة بتقدمها على الموقع دا ب5 دولار.
5-proZ
و دا موقع متخصص في مجال الترجمة و ممكن الناس تشوفه انه مكلف من ناحية النظام المالي بتاعه .
ـــــــــــــــــــــــــــــــــــــــــــــــــــــــــــــــ
طبعا أي حد ليه الحرية في انه يقرر هيشتغل على موقع متخصص في مجال الترجمة ولا هيشتغل في المواقع المتخصصة في كل حاجه.
ــــــــــــــــــــــــــــــــــــــــــ
-: حاجات تاخد بالك منها لو عاوز تبقى فري لانسر صح
1-لو عاوز تبقى فري لانسر صح اوعى تشترك في مواقع مجهولة أو لسه بتبدأ في مجال العمل الحر
2- لو عاوز تبقى فري لانسر صح اوعى تخالف قوانين الموقع و اللي لازم تكون حافظها أكتر من اسمك.
3- لو عاوز تبقى فري لانسر صح بلاش تقدم على شغل أعلى من قدراتك أو مطلوب فيه حاجات انت مش بتعرف تعملها (افتكر اني قولتلك بلااش)
4- لو عاوز تبقى فري لانسر صح متغيرش الوقت اللي اتفقت عليه مع العميل عشان متبوظش سمعتك اللي انت محيلتكش غيرها في المجال :D
5- لو عاوز تبقى فري لانسر صح متتعاملش مع عميل سمعته وحشه الا لو انت كمان سمعتك وحشه (الطيور على أشكالها تقع)
6- لو عاوز تبقى فري لانسر صح أوعى العميل يقولك تعالى نشتغل بعيد عن الموقع و تروح معاااااه ( اللي أوله كفته آخره اييييييه .....)
7- لو عاوز تبقى فري لانسر صح ابعد عن الشغل المشبوه اللي ميرضيش ربنا عشان مفيش اكتر منه.
ــــــــــــــــــــــــــــــــــــــــــــــــــــــــــــــــ
كدا احنا قولنا نبذه عن ازاي تشتغل فري لانسر و تبدأ ازاي و تشتغل في ايه و تخلي بالك من ايه؟؟
لو فيه حاجة مش واضحة في اللي قولنا و لسه عاوز تعرف أكتر ياريت تقولنا ايه االلي عاوز تعرفه و احنا هنرد عليك في أقرب وقت ان شاء الله
Land of Languages : و ممكن تبعتولنا هنا على صفحة الفيس بوك الخاصة بمجال الترجمة
_____________________________________
ليست هناك تعليقات:
إرسال تعليق